عام انتخابات میں دھاندلی سے متعلق کمشنر راولپنڈی کے الزامات پر الیکشن کمیشن نے انکوائری رپورٹ منظرعام پر لانے کا فیصلہ کر لیا۔
الیکشن کمیشن آف پاکستان کے ذرائع کے مطابق سابق کمشنر راولپنڈی کے الزامات کے حوالے سے اہم پیش رفت سامنے آئی ہے ، ای سی پی نے انکوائری رپورٹ منظرعام پر لانے کا فیصلہ کیا ہے تاہم انکوائری رپورٹ پبلک کرنے سے قبل الیکشن کمیشن کے اجلاس میں پیش کی جائے گی۔
ذرائع کے مطابق الیکشن کمیشن آف پاکستان انکوائری رپورٹ کی سفارشات پر من وعن عمل کرے گا ۔
یاد رہے کہ الیکشن کمیشن نے سابق کمشنر راولپنڈی لیاقت چٹھہ کے الزامات کی تحقیقات کے لیے ممبر سندھ نثار درانی پر مشتمل ایک رکنی کمیٹی قائم کی تھی ۔
ای سی پی کے مطابق انکوائری رپورٹ ڈسٹرکٹ اور ریٹرننگ افسران کے بیانات پر مشتمل ہے، سابق کمشنر راولپنڈی نے کمیٹی میں تحریری بیان جمع کرایا تھا۔
یاد رہے کہ سابق کمشنر راولپنڈی لیاقت علی چٹھہ نے 8 فروری کے عام انتخابات میں سنگین بے ضابطگیوں کے الزامات عائد کرتے ہوئے عہدے سے مستعفی ہونے کا اعلان کیا تھا۔
ترجمان الیکشن کمیشن اور چیف جسٹس پاکستان نے سابق کمشنر راولپنڈی کے الزامات کو مسترد کر دیا تھا۔
