سعودی ولی عہد محمد بن سلمان کا آئندہ ہفتے دورہ پاکستان متوقع ہے۔ وزیر اعظم شہباز شریف نے دورے کی تیاری کی وجہ سے اپنی دیگر مصروفیات ترک کردی ہیں۔
نجی ٹی وی نے سفارتی ذرائع کے حوالے سے بتایا کہ دورے کے حوالے سے تاریخوں کو حتمی شکل دینے پر کام جاری ہے، دورہ آئندہ ہفتے کے آخری دنوں میں متوقع ہے۔
ذرائع کے مطابق سعودی ولی عہد کا 2019 کے بعد سے پاکستان کا یہ پہلا دو طرفہ دورہ ہوگا، وزیر اعظم نے اپنی دیگر مصروفیات ترک کردی ہیں معلوم ہوا ہے کہ شہباز شریف سعودی ولی عہد کے دورے سے متعلق انتظامی امور کی خود نگرانی کریں گے۔
ذرائع کے مطابق سعودی ولی عہد محمد بن سلمان اپنے وفد کے ہمراہ پاکستان پہنچیں گے، محمد بن سلمان کے متوقع دورے میں پاکستان میں 5 ارب ڈالر کی سرمایہ کاری کے فیصلوں پر عمل درآمد کی یادداشتوں پر دستخط بھی متوقع ہیں۔
واضح رہے کہ سعودی عرب کا اعلیٰ سطح کا وفد گذشتہ روز پاکستان پہنچ گیا ہے، 50 رکنی وفد میں 30 سے زائد کمپنیوں کے سرمایہ کاربھی شامل ہیں۔ سعودی تجارتی وفد پاکستان میں سرمایہ کاری کے شعبے میں باہمی تعاون کیلئے آیا ہے۔
سعودی وفد کی قیادت نائب وزیر سرمایہ کاری کر رہے ہیں، وفد تین روز تک پاکستان میں قیام کرے گا۔
بزنس ٹو بزنس (B2B) میٹنگز کے دوران زراعت، کان کنی، انسانی وسائل، توانائی، کیمیکلز اور میری ٹائم سمیت متعدد شعبوں پر تبادلہ خیال کیا جائے گا۔
