لاہور ( نئی تازہ رپورٹ) مسلم لیگ ن پنجاب نے تنظیمی اجلاس میں نوازشریف کودوبارہ پارٹی صدر بنانے کے حق میں قرارداد منظور کرلی۔
متفقہ منظور کی گئی قرارداد کے مطابق مسلم لیگ ن کے عہدیداروں اور کارکنوں نے قائد میاں نواز شریف کی قیادت پر مکمل اعتماد کا اظہار کیا، قرار داد میں کہا گیا کہ نواز شریف کو 2017 میں ایک سازش کے تحت نااہل کیا گیا اور انہیں پاکستان مسلم لیگ ن کی صدارت سے جبری طور پر محروم کیا گیا۔
قرارداد میں کہا گیا کہ آج جبکہ سازشی آرڈرز اور جعلی سزائیں انجام کو پہنچ چکی ہیں، اللہ نے قائد نواز شریف کو سرخرو کر دیا ہے، پاکستان مسلم لیگ ن اپنے قائد میاں محمد نواز شریف سے استدعا کرتی ہے کہ وہ پارٹی صدارت دوبارہ سنبھالیں تاکہ پارٹی ان کی ولولہ انگیز قیادت میں عوامی مقبولیت کی نئی جہتیں طے کر سکے۔
قرارداد میں ضمنی انتخابات میں پارٹی کی بھرپور کامیابی پر پنجاب کی تنظیم بالخصوص پارٹی قیادت کو مبارکباد پیش کی گئی ۔
