احتساب عدالت کے حکم پرتحریک انصاف کے بانی عمران خان کی اہلیہ بشریٰ بی بی کا نجی ہسپتال میں طبی معائنہ کیا گیا ۔
میڈیا رپورٹ کے مطابق سابق خاتون اول بشریٰ بی بی کو احتساب عدالت کے حکم پرطبی معائنے کے لیے شفا ہسپتال اسلام آباد منتقل کیا گیا جہاں ڈاکٹرز کی ٹیم نےان کی ای سی جی، ایکو، اینڈو اسکوپی اور الٹراساؤنڈ ٹیسٹ کیے۔
نجی ٹی وی کی رپورٹ کے مطابق بشریٰ بی بی میں معمولی نوعیت کے گیسٹرو کی تشخیص ہوئی ہے جب کہ دیگر رپورٹس کلیئر قرار دی گئی ہیں۔
ذرائع کے مطابق بشریٰ بی بی میڈیکل چیک اور اپ ٹیسٹوں کےلیے 6 گھنٹے ہسپتال میں رہیں۔
ہسپتال ذرائع کے مطابق بشریٰ بی بی نے اس دوران بلڈ ٹیسٹ کرانے سے انکار کیا، چیک اپ کے وقت عمران خان کے ذاتی معالج ڈاکٹر عاصم بھی موجود رہے۔
ہسپتال ذرائع کے مطابق ٹیسٹ کے لیے خون کا نمونہ نہ دینے کا معاملہ حتمی رپورٹ میں تحریر کیا جائے گا۔
ذرائع کے مطابق بشریٰ بی بی کی میڈیکل رپورٹس جیل سپرنٹنڈنٹ اور پمز ہسپتال کو فراہم کی جائیں گی۔ جبکہ رپورٹس کی کاپی ڈاکٹر عاصم کو بھی دی جائے گی۔
