لاہور ( نئی تازہ مانیٹرنگ ) لاہور کے پانچ حلقوں میں ضمنی الیکشن کی وجہ سے انٹرمیڈیٹ پارٹ 2 (12 ویں جماعت) کے سالانہ امتحانات 2024 کے پیپرز ملتوی کر دیے گئے ہیں۔
میڈیا رپورٹ کے مطابق لاہور میں ضمنی الیکشن کی وجہ سے کیمسٹری اور انگریزی کے پیپرز ملتوی کرنے کا فیصلہ کیا گیا۔ تعلیمی بورڈ نے اس حوالے سے نوٹیفکیشن بھی جاری کیا گیا ہے۔
لاہور بورڈ کی ڈیٹ شیٹ کے مطابق 20اپریل کوکیمسٹری اور کچھ دیگر مضامین کے پیپر ہونا تھا، جبکہ22 اپریل کو انگریزی لازمی کا پیپر شیدول تھا، تاہم اب یہ پیپرز ملتوی کردیئے گئے ہیں۔
نجی ٹی وی کی رپورٹ میں ترجمان لاہور بورڈ کے حوالے سے بتایا گیا ہے کہ ضمنی الیکشن میں ٹیچرز کی ڈیوٹیز کی وجہ سے پیپر ملتوی کئے گئے ہیں۔
ترجمان کے مطابق انٹرمیڈیٹ کے ملتوی شدہ پیپرز کی متبادل تاریخوں کا اعلان بعد میں کیا جائے گا۔
نوٹ: طلبا کو مشورہ دیا جاتا ہے کہ وہ اپنے متعلقہ تعلیمی ادارے، امتحانی مرکز یا لاہور بورڈ سے رابطہ کرکے اپنے علاقے میں پیپرز ملتوی ہونے یا نہ ہونے سے متعلق تصدیق کر لیں ۔
