راولپنڈی ( نئی تازہ رپورٹ) بانی تحریک انصاف عمران خان سے ان کی اہلیہ بشریٰ بی بی کی اڈیالہ جیل میں ملاقات ہوئی ۔ جس کے لیے بشریٰ بی بی کو بنی گالہ سے اڈیالہ جیل لایا گیا۔
میڈیا رپورٹ میں جیل ذرائع کے حوالے سے بتایا گیا ہے کہ عدالتی احکامات کے مطابق عید کے موقع پر عمران خان اور بشریٰ بی بی کے ملاقات کرائی گئی ، ذرائع کے مطابق ملاقات اڈیالہ جیل کانفرنس روم میں ہوئی۔ بشریٰ بی بی کے اڈیالہ جیل پہنچنے پر عمران خان کو کانفرنس روم پہنچایا گیا۔
دونوں کے درمیان ملاقات ایک گھنٹہ جاری رہی۔ جس کے بعد بشریٰ بی بی کو واپس بنی گالا سب جیل پہنچا دیا گیا۔
رپورٹس کے مطابق بشریٰ بی بی کو سیکیورٹی حصار میں بنی گالہ سے اڈیالہ جیل لایا گیا ، جیل کے سامنے سڑک ایک جانب سے بند کر دی گئی ۔
عید کے روزپی ٹی آئی کے بعض کارکنان نے اڈیالہ جیل کے باہرعمران خان کے حق میں احتجاجی مظاہرہ کیا اور نعرے لگائے۔
پولیس نے جیل کے مرکزی گیٹ پر احتجاج کرنے والےچند پی ٹی آئی کارکنوں کو حراست میں لے لیا ۔ پولیس کے مطابق کارکن پابندی کے باوجود ویڈیو بنا رہے تھے جس پرانہیں حراست میں لیا گیا۔
