پاکستان کے اویس منیر نے دفاعی چیمپئن کو ہرا کر ایشین اسنوکر چیمپئن شپ کے فائنل کیلئے کوالیفائی کرلیا ۔
قطر میں جاری ایشین اسنوکر چیمپئن شپ کے سیمی فائنل میں اویس منیر کا مقابلہ دفاعی چیمپئن ایران کے عامر سرکوش سے تھا۔
پاکستانی کیوئسٹ نے اہم مقابلے میں بہترین کیو کنٹرول کا مظاہرہ کرتے ہوئے تجربہ کار مد مقابل کو چار ۔ ایک سے شکست دی اور انہیں پانچواں فائنل کھیلنے سے محروم کردیا۔
اویس منیرنے پہلا فریم 36-57 کے اسکور سے جیتا، دوسرے فریم میں ایران کےعامر سرکوش نے کم بیک کیا اور یکطرفہ مقابلے کے بعد اویس کو آئوٹ کلاس کیا، دوسرے فریم میں 80-0 کی شکست سے مقابلہ ایک ۔ ایک سے برابر ہو گیا مجس کے بعد اویس نے گیم پر کنٹرول حاصل کیا اور اگلے تین فریمز 17-75، 47-67 اور 32-69 کے اسکور سے جیت کر فائنل میں پہنچ گئے۔
ٹورنامنٹ کا فائنل جمعہ کو کھیلا جائے گا۔ اویس منیر 2015 کے بعد پہلے پاکستانی کیوئسٹ ہیں جو ایشین اسنوکر چیمپئن شپ کے فائنل میں پہنچے ہیں ۔ 2015 میں پاکستان کے حمزہ اکبر نے ٹورنامنٹ کے فائنل میں پہنچ کر ٹائٹل اپنے نام کیا تھا۔
