کولمبو( نئی تازہ رپورٹ) لنکا پریمیر لیگ ( ایل پی ایل) پانچویں ایڈیشن کے شیڈول کا اعلان کر دیا گیا، یکم جولائی 2024 سے شروع ہونے والے ٹورنامنٹ میں مجموعی طور پر 24 میچز کھیلے جائیں گے۔
سری لنکن کرکٹ بورڈ (سری لنکا کرکٹ) نے جمعہ کو جاری پریس ریلیز میں اعلان کیا ہے کہ لنکا پریمیر لیگ( LPL) کا 2024 ایڈیشن یکم جولائی سے 21 جولائی تک منعقد ہو گا۔ جس میں پانچ ٹیمیں شریک ہوں گی، جبکہ ٹورنامنٹ میں کل 24 میچز کھیلے جائیں گے۔
پریس ریلیز کے مطابق ایل پی ایل 5 کے ابتدائی مرحلے میں 20 میچز منعقد ہوں گے، جبکہ اختتامی مرحلے میں 4 میچزکھیلے جائیں گے، جن میں کوالیفائر 1 اور 2 اور ایلیمنیٹر شامل ہیں۔ ہر ٹیم کو کم از کم 20 کھلاڑیوں اور زیادہ سے زیادہ 24 کھلاڑیوں پر مشتمل ایک سکواڈ رکھنا ہوگا، جس میں 6 غیر ملکی کھلاڑی بھی شامل ہوں گے۔
واضح رہے کہ لنکا پریمیر لیگ سری لنکا کا سب سے بڑی ٹی 20 ڈومیسٹک مقابلہ ہے، جس میں انٹرنیشنل کھلاڑی بھی شرکت کرتے ہیں۔ جس سے ٹورنامنٹ دنیا بھر کے شائقین کی توجہ حاصل کرتا ہے۔
