راولپنڈی ( نئی تازہ رپورٹ) مسلم لیگ ق کے سربراہ چوہدری شجاعت اورخاندان کے دیگر رہنماؤں نے اڈیالہ جیل میں پی ٹی آئی کے صدر چوہدری پرویز الہیٰ سے طویل ملاقات کی ۔
میڈیا رپورٹ کے مطابق چوہدری پرویز الہیٰ سے ملاقات کے لیے چوہدری شجاعت حسین، چوہدری وجاہت حسین،چوہدری سالک،چوہدری شافع اور منتہا اشرف جمعرات کو اڈیالہ جیل پہنچے ذرائع کے مطابق چوہدری خاندان کے افراد کی پرویز الہیٰ سے ملاقات اڈیالہ جیل کے کانفرنس روم میں ہوئی۔
ذرائع کے مطابق ملاقات میں ملک کی موجودہ سیاسی صورتحال اور خاندانی معاملات پربات چیت کی گئی۔
اس موقع پر پرویز الہیٰ کی صحت اور فراہم کی جانے والی سہولیات پر بھی بات ہوئی۔
اڑھائی گھنٹے سے زائد جاری رہنے والی ملاقات کے بعد چوہدری خاندان کے افراد اڈیالہ جیل کے باہر موجود میڈیا سے بات کے بغیر واپس روانہ ہو گئے۔
