لندن( نئی تازہ مانیٹرنگ) برطانیہ کے بادشاہ چارلس کی فلاحی تنظیم برٹش ایشین ٹرسٹ نے پاکستانی گلوکار راحت فتح علی خان سے وابستگی ختم کردی۔
گھریلو تشدد کے خلاف کام کرنے والی فلاحی تنظیم برٹش ایشین ٹرسٹ کی جانب سے جاری ایک بیان میں کہا گیا ہے کہ راحت فتح علی خان کی ملازم پر تشدد کرنے کی ویڈیو کی تحقیقات کریں گے، ہم بدسلوکی کے الزامات کو سنجیدگی سے لیتے ہیں۔
ٹرسٹ ترجمان نے کہا کہ برٹش ایشین ٹرسٹ بدسلوکی کے خلاف ہے اور اس نے راحت فتح علی خان کے ساتھ کسی بھی قسم کا تعلق ختم کردیا ہے ہم ہر قسم کے تشدد کی سختی سے مذمت کرتے ہیں چاہے حالات کچھ بھی ہوں۔
یاد رہے کہ برٹش ایشین ٹرسٹ کی بنیاد کنگ چارلس سوم نے رکھی تھی اور2017 میں ٹرسٹ نے راحت فتح علی خان کو سفیر مقرر کیا گیا تھا۔
چند روز قبل راحت فتح علی خان کی ایک ویڈیو سوشل میڈیا پر وائرل ہوئی تھی جس میں انہیں ملازم پر تشدد کرتے دیکھا گیا تھا۔ بعد ازاں راحت فتح علی نے اپنے ملازم کے ہمراہ وضاحتی بیان بھی جاری کیا تھا۔
