بلوچ یکجہتی کمیٹی نے اسلام آباد میں جاری دھرنا ختم کرنے کا اعلان کر دیا، ماہ رنگ بلوچ نے دھرنا ختم کرنے کا اعلان کرتے ہوئے کہا کہ ہم اسلام آباد سے واپس بلوچستان روانہ ہو رہے ہیں۔
اس موقع پر ماہ رنگ بلوچ نےکہا کہ ہم ریاست کے خلاف نہیں ہم چاہتے ہیں کہ لاپتہ افراد کو عدالتوں میں پیش کیا جائے۔انہوں نے کہا کہ آج ہم اپنی تحریک کا چوتھا مرحلہ ختم کرنے کا اعلان کرتے ہیں۔
ماہ رنگ نے کہا کہ دھرنے کے خاتمے کے ساتھ ہی ہم اپنی تحریک کے پانچویں مرحلے کا اعلان کرتے ہیں۔ ہم سوشل میڈیا اور دیگر چینلز کے ذریعے تحریک کی آواز کو مزید اجاگر کریں گے۔
انہوں نے کہا کہ ہم اسلام آباد سے واپس بلوچستان روانہ ہو رہے ہیں ہم اپنی تحریک پورے ملک میں پھیلائیں گے، انہوں نے کہا کہ 27 جنوری کو بلوچستان میں جلسہ منعقد کیا جائے گا۔
