راولپنڈی( نئی تازہ رپورٹ) پولیس وردیوں میں ملبوس ڈاکوئوں نے برطانیہ پلٹ اوورسیز پاکستانی کو فائرنگ کرکے قتل کردیا اور قیمتی اشیاء سے بھرا ہینڈ بیگ لوٹ کر فرار ہوگئے۔
میڈیا رپورٹ کے مطابق برطانیہ میں مقیم ڈھڈیال آزاد کشمیر کے رہائشی اوورسیز پاکستانی تصرف محمود برطانیہ سے نیو اسلام آباد ایئرپورٹ پہنچے ،جہاں انکے کزن اپنی 6 سالہ بیٹی کے ہمراہ انہیں گاڑی میں ساتھ لے کرڈھوک چوہدریاں میں واقع رشتہ داروں کے گھرکی طرف روانہ ہوئے۔
رپورٹ کے مطابق رینج روڈ پر پولیس وردیوں میں ملبوس تین موٹر سائیکل سواروں نے باقاعدہ ناکہ لگا کر ان کی گاڑی کو چیکنگ کا کہہ کرروکااور پاسپورٹ چیک کرتے ہوئے ہینڈ کیری بیگ چھیننے کی کوشش کی جس پرتصرف محمود نے مزاحمت کی کوشش کی تومسلح ڈاکو نے گاڑی میں معصوم بچی کی موجودگی میں فائرنگ شروع کر دی۔
فائرنگ کے نتیجے میں تصرف محمود شدید زخمی ہو گیا جبکہ ملزمان غیر ملکی کرنسی، قیمتی اشیاء و دیگر سفری دستاویزات سمیت ہینڈ بیگ لوٹ کر فرار ہوگئے۔ زخمی تصرف محمود کو ہسپتال منتقل کیا گیا مگر وہ زخموں کی تاب نہ لاتے ہوئے دم توڑ گیا۔
اطلاع ملتے ہی پولیس ٹیم موقع پر پہنچی اورشواہد اکھٹے کرکے تحقیقات شروع کر دیں۔
مقامی پولیس کے مطابق علاقے میں نصب کلوز سرکٹ ٹی وی کیمروں کی ویڈیو فوٹیج اکھٹی کی جارہی مہیں ہیں، ملزمان کو تلاش کرکے قانون کے کٹہرے میں کھڑا کیا جائے گا۔
ایک دوسرے واقعہ میں راولپنڈی تھانہ چونترہ کے علاقے میں مخالفین نے گاڑی پر فائرنگ کر کے 8 سالہ بچی سمیت 3 افراد کو قتل کردیا ۔
پولیس کے مطابق جاں بحق افراد میں شجاع یونس، عاطف اور 8سالہ انابیہ شامل ہیں جبکہ 3 افراد زخمی بھی ہوئے جن میں فلک شیر، ثاقب اور تابندہ شامل ہیں، لاشوں اور زخمیوں کو ہسپتال منتقل کر دیا گیا ہے۔
میڈیا رپورٹ کے مطابق مقتولین گاڑی پرسوار تھے کہ مخالف فریق نے فائرنگ کردی۔