اسلام آباد ( نئی تازہ رپورٹ) اسلام آباد ہائی کورٹ نے ڈپٹی کمشنر اسلام آباد کے تھری ایم پی او کے تحت نظر بندی کے احکامات جاری کرنےکے اختیارکو غیر قانونی قرار دے دیا۔
پی ٹی آئی کے رہنما شہریار آفریدی اور شاندانہ گلزار کی 3 ایم پی او کے تحت نظر بندی سے متعلق کیس کی سماعت اسلام آباد ہائیکورٹ میں ہوئی۔
اسلام آباد ہائیکورٹ کے جسٹس بابر ستار نے شہریار آفریدی اور شاندانہ گلزار کی ایم پی او آرڈر کے خلاف درخواستیں منظور کرتے ہوئے محفوظ شدہ فیصلہ سنایا۔
عدالت نے کہا ہے کہ ڈپٹی کمشنر اسلام آباد کے پاس تھری ایم پی او کے تحت احکامات جاری کرنے کا اختیار نہیں، یہ اختیار صرف وفاقی کابینہ کے پاس ہونا چاہیے۔
ہائیکورٹ کے جج بابر ستار نے تھری ایم پی او 1980 کے قانون کی سیکشن 18 کو غیر قانونی قرار دیتے ہوئے درخواست نمٹا دی۔
