راولپنڈی( نئی تازہ رپورٹ) پی ٹی آئی کے وائس چئیرمین شاہ محمود قریشی کو اڈیالہ جیل میں نظر بند کر دیا گیا۔
ڈپٹی کمشنر راولپنڈی کی طتف سے جاری نظر بندی کے احکامات کے مطابق شاہ محمود قریشی 15 روز کے لیے نظر بند رہیں گے۔
نوٹیفکیشن کے مطابق پاکستان تحریک انصاف (پی ٹی آئی) کے وائس چئیرمین 9مئی کو جی ایچ کیو گیٹ حملہ کیس میں ملوث ہیں. انکی رہائی سے امن وامان کی صورتحال خراب ہونے کا خدشہ ہے۔
سی پی او نے ایس ایچ اوتھانہ صدر بیرونی کی رپورٹ پر 45 روزہ نظر بندی کی تجویز دی جبکہ ڈسٹرکٹ انٹیلی جنس کمیٹی نے بھی پولیس اور قانون نافذ کرنے والے اداروں کی رپورٹ سے اتفاق کیا۔
نوٹیفکیشن کے مطابق شاہ محمود قریشی کو 15روز کے لیے نظر بند کر دیا گیا ہے۔
یاد رہے کہ سپریم کورٹ نے سائفر کیس میں عمران خان کے شریک ملزم کی حیثیت سےشاہ محمود قریشی کی ضمانت منظور کی تھی، وکلا نے ضمانتی مچلکے جمع کرائے تھےجس کے بعد آج شاہ محمود کی جیل سے رہائی کا امکان تھا۔ تاہم ان کی نظر بندی کے احکامات جاری کر دیئے گئے۔
