اسلام آباد ( نئی تازہ رپورٹ) کاغذات نامزدگی جمع کرانے کی مدت ختم ہونے کے بعد الیکشن کمیشن کل ( پیر) سے کاغذات نامزدگی کی جانچ پڑتال شروع کرے گا۔
الیکشن کمیشن کے شیڈول کے مطابق 25 سے 30 دسمبر تک انتخابی کاغذات کی جانچ پڑتال کی جائے گی۔
الیکشن کمیشن اف پاکستان( ای سی پی) کی جانب سے کاغذات نامزدگی جمع کرانے کی مدت میں دو روز کی توسیع کی گئی تھی توسیع کے بعد 24 دسمبر کو کاغذات جمع کرانے کا عمل مکمل ہونے پر ریٹرننگ افسران کی طرف سے امیدواروں کی ابتدائی فہرستیں جاری کردی گئی ہیں۔
یہ بھی پڑھیں :الیکشن کمیشن نے کاغذات نامزدگی جمع کرانے کی مدت میں 2 روز کی توسیع کردی
اس دوران الیکشن کمیشن نے سیاسی جماعتوں کی فہرست بھی جاری کر دی ہے جس کے مطابق ای سی پی میں 175 سیاسی جماعتیں اور گرینڈ ڈیموکریٹک الائنس (جی ڈی اے) کے نام سے ایک اتحاد رجسٹرڈ ہے۔
فہرست میں پاکستان تحریک انصاف کے سربراہ کے نام کے سامنے جگہ خالی ہے اور کسی کا نام درج نہیں ہے۔
واضح رہے کہ8 فروری 2024 کو ہونے والے الیکشن میں حصہ لینے کے لیے کاغذات نامزدگی جمع کرانے کا وقت آج شام ساڑھے چار بجے اختتام کو پہنچا تھا۔
الیکشن کے لیے کاغذات نامزدگی جمع کرانے کے آخری روز بھی بڑی تعداد میں دستاویزات جمع کرانے کا سلسلہ جاری رہا ۔
