راولپنڈی ( نئی تازہ رپورٹ) خیبر پختون خوا کے ضلع بنوں میں موٹر سائیکل سوارکے خود کش حملے کے نتیجے میں 2 شہری شہید، 3 فوجیوں سمیت 6 افراد زخمی ہو گئے۔
پاک فوج کے شعبہ تعلقاتِ عامہ (آئی ایس پی آر) کے مطابق گزشتہ روز بکا خیل بنوں میں ایک موٹر سائیکل سوار خود کش حملہ آور نے سیکیورٹی فورسز کے قافلے پر حملہ کیا۔
بیان میں بتایا گیا ہے کہ خود کش حملہ آور کی شناخت افغان شہری کے طور پر ہوئی ہے، حملہ آور کا تعلق حافظ گل بہادر گروپ سے ہے۔
ترجمان پاک فوج نے کہا ہے کہ حملے میں 2 معصوم شہری شہید ہوگئے، جبکہ 3 فوجی اہلکار اور 3 شہری زخمی ہو ئے۔
آئی ایس پی آر کے مطابق علاقے میں کسی اور دہشت گرد کی موجودگی کو ختم کرنے کے لیے آپریشن جاری ہے، بیان میں کہا گیا ہے کہ پاکستانی سیکیورٹی فورسز دہشت گردی کی لعنت کے خاتمے کے لیے پُر عزم ہیں۔
