دوحہ ( نئی تازہ رپورٹ) جمعیت علما اسلام کے سربراہ مولانا فضل الرحمان کی قطرمیں حماس کے رہنماؤں اسماعیل ہانیہ اور خالد مشعل سے ملاقات ہوئی ہے۔
مولانا فضل الرحمان نے وفد کے ہمراہ قطر میں حماس رہنماؤں سے ملاقات میں مسئلہ فلسطین پر تفصیلی تبادلہ خیال کیا، ملاقات میں سیکرٹری جنرل جے یو آئی سندھ مولانا راشد محمود سومرو اور مفتی ابرار احمد بھی شریک ہوئے۔
مولانا فضل الرحمان نے گفتگومیں کہا کہ اسرائیل فلسطین میں ظلم وستم کرکے قبلہ اول کو ہیکل میں بدلنے کی مذموم کوشش کر رہا ہے۔
مولانا فضل الرحمان نے کہا کہ ترقی یافتہ ممالک ہونے کے دعویداروں کے ہاتھ معصوم بچوں اور خواتین کے خون سے رنگے ہیں، فلسطینی صرف اپنی زمین ہی نہیں بلکہ امت مسلمہ کی طرف سے فرض ادا کرتے ہوئے قبلہ اول کی آزادی کی جنگ لڑ رہے ہیں، انہوں نے کہا کہ وقت آ گیا ہے کہ امت مسلمہ عملی میدان میں فلسطینی بھائیوں کے شانہ بشانہ کھڑی ہو۔
حماس کے رہنما اسماعیل ہانیہ نے کہا کہ امت مسلمہ کا فرض ہے کہ وہ اسرائیلی مظالم کے خلاف متحد ہو جائے، انسانی حقوق کے دعویدار ممالک ہتھیاروں سے بھرے جہاز لے کر تل ابیب پہنچ رہے ہیں، امت مسلمہ بھی فلسطینی بھائیوں کی حمایت کیلئے نکلے اور اپنی ماؤں بہنوں اور بھائیوں کی مدد کرے۔
حماس رہنما خالد مشعل نے کہا کہ مولانا فضل الرحمان پاکستان میں فلسطین کے سفیر کا کردار ادا کر رہے ہیں،انہوں نے کہا کہ کشمیر اور فلسطین پر عرصہ دراز سے مظالم انسانی حقوق کے دعویداروں کے منہ پر طمانچہ ہے۔
