میاں چنوں ( نئی تازہ رپورٹ) معروف عالم دین مولانا طارق جمیل کے بیٹے پراسرارطور پر گولی لگنے سے جاں بحق ہو گئے۔
نجی ٹی وی نے آر پی او ملتان سہیل چوہدری کے حوالے سے بتایا کہ مولانا طارق جمیل کے بیٹے عاصم جمیل کے سینے پر گولی لگی ہے۔ دوسرے ٹی وی چینل کے مطابق ڈی ایس پی میاں چنوں نے واقعہ سے متعلق بتایا کہ مولانا عاصم جمیل نے اپنے سینے پر گولی ماری، انہیں تشویشناک حالت میں تلمبہ رورل ہیلتھ سنٹر پہنچایا گیا مگرجان کی بازی ہار گئے۔
ڈی ایس پی میاں چنوں نے کہا کہ مولانا عاصم جمیل کی خود کشی کی تاحال کوئی وجہ سامنے نہیں آ سکی، واقعہ سے متعلق تحقیقات کر رہے ہیں۔
اس حوالے سے مولانا طارق جمیل نے ایکس ( ٹوئٹر) پر اپنی پوسٹ میں کہا کہ آج تلمبہ میں میرے بیٹے عاصم جمیل کا انتقال ہوگیا ہے.
انہوں نے لکھا کہ اس حادثاتی موت نے ماحول کو سوگوار بنا دیا ہے۔ مولانا طارق جمیل نے کہا کہ آپ سب سے گزارش ہے کہ اس غم کے موقع پر ہمیں دعاؤں میں یاد رکھیں.انہوں نے دعا کی کہ اللہ میرے فرزند کو جنت الفردوس میں اعلیٰ مقام عطا فرمائے۔
