پنجاب میں صوبائی حکومت چینی کی قیمتیں مقرر کرے گی،لاہور ہائی کورٹ

لاہور (نئی تازہ رپورٹ) لاہور ہائی کورٹ نے چینی کی قیمتوں کے تعین بارے کیس کا محفوظ فیصلہ سنا دیا، عدالت نے حکم دیا ہے کہ پنجاب میں صوبائی حکومت چینی کی قیمتیں مقرر کرے گی۔ جمعرات کولاہور ہائیکورٹ کے جسٹس شاہد کریم کی سربراہی میں2 رکنی بینچ نے کیس کا محفوظ کیا گیا فیصلہ سنایا۔عدالتی فیصلے میں کہا گیا ہے کہ صوبے میں چینی کی قیمتیں پنجاب حکومت مقرر کرے گی۔لاہور ہائی کورٹ نے وفاقی سیکریٹری کنٹرولر جنرل پرائس کا چینی کی قیمت مقرر کرنے کا نوٹیفکیشن کالعدم قرار دے دیا ہے۔عدالت نے مختصر فیصلے میں کہا ہے کہ صوبہ پنجاب کی حد تک پرائس ایکٹ 1977 کالعدم قرار دیا جاتا ہے، تفصیلی فیصلہ بعد میں جاری کیا جائے گا۔ یاد رہے کہ شوگر ملز مالکان نے چینی کی قیمتیں مقرر کرنے کا وفاقی حکومت کا اقدام چیلنج کر رکھا تھا،اور عدالت نے گذشتہ سماعت پرکیس کا فیصلہ محفوظ کر لیاتھا۔