کولمبو ( نئی تازہ رپورٹ) پاکستان اور بھارت کے درمیان ایشیا کپ سپر فور مرحلے کا میچ مسلسل بارش کے باعث مکمل نہ ہو سکا، کل پیر کے ریزرو ڈے پر دونوں ٹیمیں میچ مکمل کریں گی۔
بارش کے باعث میچ روکا گیا تو بھارت کا اسکور 24.1 اوور میں 2 وکٹوں کے نقصان پر 147 رنز تھا۔
اتوار کو کولمبو میں کھیلے گئے ایشیا کپ سپر فور مرحلے کے اہم میچ میں بھارتی اوپنرز نے ابتدا سے ہی جارحانہ کھیل کا مظاہرہ کیا، دونوں اوپنرز کے درمیان 121 رنز کی پارٹنرشپ ہوئی۔
روہت شرما 56 جبکہ شبمن گِل 58 رنز بناکر آؤٹ ہوئے۔ ویرات کوہلی 8 اور کے ایل راہول 17 رنز بناکر کریز پر موجود تھے۔ پاکستان کی جانب سے شاہین آفریدی اور شاداب خان نے ایک ایک وکٹ حاصل کی۔
پاکستانی ٹیم کے کپتان بابراعظم نے ٹاس جیت کر بھارت کو بیٹنگ کی دعوت دی ، انکا کہنا تھا کہ ابتداء میں کوشش کریں گے جلد وکٹیں حاصل کر کے بھارت کو پریشر میں لائیں۔
بھارتی کپتان روہت شرما نے کہا میچ میں کامیابی سمیٹنے کی کوشش کریں گے، پہلے کھہلتے ہوئے پاکستان کے خلاف بڑا ٹارگٹ سیٹ کرنا چاہتے ہیں۔
بھارتی کپتان کے مطابق ٹیم میں دو تبدیلیاں کی گئیں، جسپریت بمراہ ٹیم میں واپس آ گئے جبکہ کے ایل راہول کو شیرس ایر کی جگہ ٹیم میں شامل کیا گیا ۔
