اسلام آباد( نئی تازہ رپورٹ) چیئرمین پی ٹی آئی عمران خان کے خلاف ایف آئی اے نے سائفر گمشدگی کے معاملے پرمقدمہ درج کرلیا۔
میڈیا رپورٹ کے مطابق وفاقی تحقیقاتی ادارے کے انسداد دہشتگردی ونگ میں سائفرکی گمشدگی کا مقدمہ درج کیا گیا ہے۔
معلوم ہوا ہے کہ ایف آئی اے کے انسداد دہشتگردی ونگ میں تعینات سینیئر افسران انکوائری کررہے ہیں۔
اطلاعات کے مطابق سائفر کی گمشدگی کے معاملے پر ایف آئی اے نے گزشتہ روز چیئرمین پاکستان تحریک انصاف سے پوچھ گچھ کی۔
بتایا گیا سائفر گمشدگی پر مشترکہ تحقیقاتی ٹیم کے ممبران نے اٹک جیل میں عمران خان سے سوالات کیے۔
ذرائع کے مطابق ایف آئی اے کی ٹیم نے چیئرمین پی ٹی آئی سے ڈپٹی سپرنٹنڈنٹ جیل کے دفتر میں ملاقات کی ۔
واضح رہے کہ ایک ہفتہ قبل امریکی میڈیا نے عمران خان کی حکومت سے متعلق سائفربارے رپورٹ جاری کی تھی ۔
ایک امریکی ویب سائٹ نے سائفر کا مبینہ متن شائع کیا تھا۔ سابق وزیراعظم شہباز شریف نے چند روز قبل ایک انٹرویو میں کہا تھا کہ وزیراعظم ہو یا کوئی اور ، وہ سائفر پڑھ تو سکتا ہے ساتھ لے کر نہیں جاسکتا لیکن چیئرمین پی ٹی آئی خلافِ قانون سائفر ساتھ لے گئے اور پھر گم بھی کر دی،شہباز شریف نے کہا تھا کہ اس معاملے کی ایف آئی اے تحقیقات کر رہا ہے۔
واضح رہے کہ سبکدوش وفاقی کابینہ نے سائفر کے غائب ہونے پر چیرمین پی ٹی آئی عمران خان، اُن کے سابق پرنسپل سیکریٹری اعظم خان اور قریبی ساتھیوں کے خلاف آفیشل سیکریٹ ایکٹ کے تحت مقدمہ چلانے کی منظوری دی تھی اور اس معاملے کی تحقیقات ایف آئی اے کو سونپی گئی تھیں۔