اسلام آباد ( نئی تازہ رپورٹ) نگران وزیراعظم کے لیے رواں ہفتے حتمی نام کا فیصلہ کرلیا جائے گا۔ مسلم لیگ (ن) اور پیپلزپارٹی کی مرکزی قیادت کی جانب سے مختلف ناموں پر غور جاری ہے۔ مجوزہ نام وزیر اعظم کے سامنے رکھے جائیں گے۔
نجی ٹی وی نے ذرائع کے حوالے سے بتایا کہ نگران وزیر اعظم کے لیے حکومت اور اتحادی جماعتوں کی قیادت میں مشاورت کا عمل جاری ہے، نواز شریف اور آصف علی زرداری اس بارے میں مشاورت کرچکے ہیں اور رواں ہفتے حتمی نام کا فیصلہ کرلیا جائے گا۔
یاد رہے کہ وزیر دفاع خواجہ آصف کہ چکے ہیں کہ مسلم لیگ (ن) اور پیپلز پارٹی کی قیادت نے فیصلہ کیا ہےکہ نگران وزیراعظم کے لیے سیاستدان کو منتخب کیا جائے گا ، اور 5 نام شارٹ لسٹ ہو چکے ہیں۔
ذرائع کے مطابق وزیراعظم شہبازشریف اور اپوزیشن لیڈر راجہ ریاض کے مابین آج بدھ کو مشاورت کا امکان ہے۔ نواز شریف اور آصف زرداری کی جانب سے تجویز کردہ نام وزیر اعظم کو پیش کیے جائیں گے۔
