اسلام آباد ( نئی تازہ رپورٹ) وزیر خارجہ بلاول بھٹو زرداری اور امریکی وزیر خارجہ انتونی بلنکن نے باہمی تعلقات، امن و سلامتی اور ترقی کے فروغ کے لیے تعمیری روابط جاری رکھنے پر اتفاق کیا ہے۔ جبکہ امریکہ نے آئی ایم ایف سے پاکستانکے حالیہ معاہدہ کو خوش آئند قرار دیتے ہوئے کہا ہے کہ پاکستان کی معاشی بحالی کے لیے اصلاحات میں مدد فراہم کریں گے ۔
ترجمان امریکی محکمہ خارجہ میتھیو ملر نے اس سلسلہ میں جاری بیان میں بتایا کہ ٹیلی فونک گفتگو میں دونوں
دونوں وزرائے خارجہ کی مختلف امور پر بات چیت ہوئی۔
امریکی وزیر خارجہ نے پاکستانی عوام کے ساتھ مضبوط امریکی عزم کا اعادہ کرتے ہوئے کہا کہ پاکستان کی اقتصادی ترقی امریکا کی اولین ترجیحات میں شامل ہے۔
انتونی بلنکن نے پاکستانی ہم منصب کو یقین دہانی کرائی کہ تکنیکی اور ترقیاتی اقدامات کے ساتھ پاکستان کے ساتھ مسلسل رابطہ میں رہیں گے۔
انہوں ںے کہا کہ پاکستان کے ساتھ بھرپور تجارتی اور سرمایہ کاری کے تعلق کو فروغ دیں گے، آئی ایم ایف سے پاکستان کا حالیہ معاہدہ خوش آئند ہے اور پاکستان کی معاشی بحالی کے لیے اصلاحات میں مدد فراہم کریں گے ۔
امریکی وزیر خارجہ نے کہا کہ جمہوری اصول اور قانون کی حکمرانی کو پاک امریکا تعلقات میں مرکزی اہمیت حاصل ہے۔
انہوں نے تسلیم کیا کہ پاکستان عوام دہشت گردی سے بری طرح متاثر ہوئے ہیں، انسداد دہشت گردی کے لیے پاکستان کے ساتھ مسلسل شراکت کو مضبوط بنائیں گے۔
بیان کے مطابق ٹیلی فونک گفتگو میں روس یوکرین جنگ اور افغانستان کی صورتحال بارے بھی تبادلہ خیال کیا گیا۔
