پشاور( نئی تازہ رپورٹ) خیبر پختونخوا کے ضلع خیبر میں پولیس اسٹیشن کے گیٹ پر خودکش حملے کے نتیجے میں ایک پولیس اہلکار شہید جبکہ 10 افراد زخمی ہوگئے۔ دو حملہ آور پولیس کی جوابی فائرنگ سے مارے گئے ۔
پولیس کے مطابق ضلع خیبر کی تحصیل باڑہ میں دو خودکش حملہ آوروں نے عمارت میں گھسنے کی کوشش کی ، لیکن فوری جوابی کارروائی سے حملہ آوروں کو مار دیا گیا اور برقت کارروائی سے حملہ ناکام بنادیا گیا۔
کمپاؤنڈ میں باڑہ تھانہ اور حساس اداروں کے دفاترقائم ہیں، حملے کے بعد سیکیورٹی ٹیموں نے جوابی کارروائی کی اور دونوں جانب سے شدید فائرنگ کا سلسلہ جاری رہا۔پولیس کی مزید نفری اور ریسکیو ٹیمیں موقع پر موجود رہی۔
ریسکیو ذرائع کے مطابق زخمیوں میں پولیس اہلکار بھی شامل ہیں جو مین گیٹ پر تعینات تھے۔ ریسکیو 1122 نے 2 زخمیوں کو طبی امداد فراہم کی جن میں سے ایک شدید زخمی کو علاج کے لیے ہسپتال روانہ کر دیا گیا۔
ہسپتال انتظامیہ کے مطابق خیبر باڑہ بازار میں دھماکا کے بعد ایک لاش اور 4 زخمیوں کو لایا گیا، 4 زخمیوں میں 3 پولیس اہلکار شامل ہیں۔
۔ دھماکے سے عمارت کی چھت گرنے سے ایک شخص نیچے دب گیا، ریسکیو 1122 کی ہیوی مشینری موقع کی جانب روانہ کر دی گئی۔
آئی جی خیبرپختونخوا اختر حیات نے میڈیا کو بتایا کہ کمپاؤنڈ پر دو دہشتگردوں نے حملہ کیا، ایک حملہ آور نے مرکزی گیٹ اور دوسرے نے عقبی راستے سے عمارت میں داخلےکی کوشش کی، ڈیوٹی پر موجود اہلکاروں نے حملہ آوروں کو عمارت کے اندر داخل نہیں ہونے دیا ، فائرنگ کے تبادلے میں دونوں خودکش حملہ آور ہلاک ہو گئے۔
