لاہور ( نئی تازہ رپورٹ) استحکام پاکستان پارٹی نے اعلان کیا ہے کہ عون چوہدری اور نعمان لنگڑیال حکومت کی مدت مکمل ہونے تک وفاقی کابینہ کا حصہ رہیں گے۔
استحکام پاکستان پارٹی کے سربراہ جہانگیر ترین نے پارٹی اجلاس کے بعد فیصلہ کا اعلان کرتے ہوئے کہا کہ ملک کو مشکلات سے نکالنے کیلئے ہی آئی پی پی وجود میں آئی ہے، موجودہ حالات کے پیش نظر ملکی مفادات پارٹی مفادات سے زیادہ عزیز ہیں۔
جہانگیر ترین نے کہا کہ ملک میں سیاسی استحکام کیلئے متحد ہونے کا پیغام دینا چاہتے ہیں ، آئی ایم ایف سے معاہدہ ابھی زیر تکمیل ہے، اس وقت ملک کو استحکام کی اشد ضرورت ہے، آئی ایم ایف ملک میں سیاسی و معاشی استحکام دیکھنا چاہتا ہے، ان حالات میں وفاقی کابینہ سے علیحدگی اختیار کر کے منفی تاثر نہیں دینا چاہتے۔
استحکام پاکستان پارٹی کے سربراہ نے کہا کہ آئی پی پی سیاسی استحکام پر یقین رکھنے والی ایک ذمہ دار پارٹی ہے ، سیاسی استحکام، معاشی استحکام سے جڑا ہے، آنے والے انتخابات میں سیاسی فیصلے اس وقت کی صورت حال کے مطابق کریں گے، پارٹی سیاست کا محور و مرکز ملک میں سیاسی و معاشی استحکام لانا ہے۔
