اسلام آباد ( نئی تازہ رپورٹ) الیکشن کمیشن نے ووٹ کے اندراج ، تصحیح و منتقلی کیلئے درخواست دینے آخری تاریخ میں توسیع کر دی ہے۔
ترجمان الیکشن کمیشن آف پاکستان کے مطابق اپنا شناختی کارڈ نمبر موبائل فون کے ذریعے 8300 پر ایس ایم ایس کر کے ووٹ سے متعلق معلومات حاصل کی جا سکتی ہیں۔
اب شہری ووٹ کے اندراج، اخراج اورتصحیح کیلئے نئی تاریخ یعنی 20 جولائی 2023 تک درخواست دے سکتے ہیں۔
ترجمان ای سی پی کے مطابق ووٹ کا اندراج شناختی کارڈ پر درج مستقل یا عارضی پتہ میں سے کسی ایک پر کروایا جاسکتا ہے۔
ووٹ کے اندراج منتقلی، اخراج یا کوائف میں کسی تبدیلی کیلئے الیکشن کمیشن کی ویب سائٹ سے فارم ڈاؤن لوڈ کیا جا سکتا ہے۔
شہری ضرورت کی صورت میں اس فارم کو پُر کرکے متعلقہ ضلعی الیکشن کمشنر کے دفتر میں جمع کروا سکتے ہیں۔ تاہم جن شہریوں کے کوائف اورتمام تفصیلات درست درج ہیں انہیں اس فارم کو جمع کرانے کی ضرورت نہیں۔
الیکشن کمیشن کے مطابق ووٹ کے اندراج اور منتقلی کیلئے شہری فارم نمبر 21 استعمال کریں۔
اسی طرح اعتراض یا ووٹ کے اخراج کیلئے فارم نمبر 22 اور کوائف کی تصحیح کیلئے فارم نمبر 23 استعمال کیا جائے۔
