لاہور( نئی تازہ رپورٹ) استحکام پاکستان پارٹی نے جہانگیر خان ترین کی وطن واپسی کے بعد ملک بھر میں سیاسی رابطے تیز کر دیئے ہیں۔
میڈیا رپورٹ کے مطابق پنجاب سے 30 سے زائد سابق ارکان اسمبلی اور رہنما ئو ں کی آئندہ دنوں میں استحکام پاکستان پارٹی میں شمولیت کا امکان ہے ، اس حوالے سے سابق ارکان اسمبلی اور رہنماؤں کے بڑے گروپ کے ساتھ معاملات کو حتمی شکل دی جا چکی ہے۔
معلوم ہوا ہے کہ جہانگیر ترین اور علیم خان آئندہ چند روز میں مختلف شہروں کے دورے کر کے اہم ملاقاتیں کریں گے، خیبرپختونخوا کی بڑی سیاسی شخصیات کے ساتھ بھی ایک بار پھر رابطہ کیا گیا ہے۔
ذرائع کے مطابق رواں ہفتے استحکام پاکستان پارٹی کی الیکشن کمیشن میں رجسٹریشن کا عمل بھی مکمل کر لیا جائے گا۔الیکشن کمیشن میں رجسٹریشن کے لئے قانونی ضابطے مکمل کر کے دستاویز ات تیار کر لی گئی ہیں۔
پارٹی قیادت نے پارٹی ممبرسازی مہم کو بھی بڑے پیمانے پر شروع کرنے کا فیصلہ کیا ہے، ممبر سازی کے لئے متعدد مقامات پر کیمپ لگائے جائیں گے۔
