لاہور( نئی تازہ رپورٹ) جہانگیرخان ترین نے استحکام پاکستان پارٹی کے اہم عہدوں کا اعلان کردیا ، عبدالعلیم خان صدر، عامر محمود کیانی سیکریٹری جنرل اور عون چوہدری ایڈیشنل سیکریٹری جنرل ہوں گے۔
استحکام پاکستان پارٹی کے سرپرست اعلیٰ جہانگیر خان ترین نے پیر کو ایک بیان میں پارٹی عہدیداروں کا اعلان کیا۔
جہانگیر ترین نے عون چوہدری کو ایڈیشنل سیکریٹری جنرل کے ساتھ ساتھ پارٹی اور سرپرست اعلیٰ کا ترجمان بھی مقرر کیا ہے۔
جہانگیر خان ترین نے سوشل میڈیا پر جاری بیان میں کہا کہ مزید فیصلے جلد کئے جائیں گے۔
یاد رہے کہ جہانگیر خان ترین نے استحکام پاکستان پارٹی کے قیام کا باضابطہ اعلان 8 جون کو لاہور میں ایک تقریب کے دوران کیا تھا، جس میں عبدالعلیم خان سمیت دیگر اہم رہنماء بھی شریک تھے۔
