کراچی ( نئی تازہ رپورٹ)روس سے خام تیل لانے والا پہلا بحری جہاز کراچی بندرگاہ پہنچ گیا۔ وزیر اعظم شہباز شریف نے اسے ایک تاریخی دن قرار دیتے ہوئے کہا ہے کہ ہم نے کم لاگت ایندھن کی فراہمی کی طرف آج پہلا اور انتہائی اہم قدم اٹھایا ہے.
وزیر اعظم نے اپنے بیان میں کہا کہ آج میں نے اپنی قوم سے کیا ہوا ایک اور وعدہ پورا کردیا ہے. مجھے یہ بتاتے ہوئے نہایت خوشی محسوس ہو رہی ہے کہ روس سے رعایتی قمیت پر خریدی گئی پہلی خام تیل کی کھیپ کراچی پہنچ گئی ہے اور اسے کل بحری جہاز سے اتارنے کا عمل شروع کر دیا جائے گا.
شہباز شریف نے کہا کہ آج کا دن ایک تاریخی تبدیلی کے دن کے طور پر یاد کیا جائے گا. ہم نے خوشحالی، معاشی ترقی، توانائی سلامتی اور کم لاگت ایندھن کی فراہمی کی طرف آج پہلا اور انتہائی اہم قدم اٹھایا ہے.
انہوں نے کہا کہ روس سے پاکستان آنے والی خام تیل کی یہ پہلی کھیپ ہے، یہ روس اور پاکستان کے مابین تعلقات کے ایک نئے باب کی شروعات ہے.
وزیر اعظم نے کہا کہ اس موقع پر میں ان تمام لوگوں کی کوششوں کو سراہتا ہوں جو اس قومی اقدام کی تکمیل میں شریک رہے اور روس سے خام تیل کی درآمد کے وعدے کو حقیقت میں بدلنے میں اپنا کردار ادا کیا.
ادھر شپنگ ذرائع کے مطابق خام تیل لےکر روسی جہاز ’پیور پوائنٹ‘ کراچی بندرگاہ پہنچا، روسی جہاز میں 45 ہزار میٹرک ٹن تیل لدا ہے۔
بتایا گیا ہے کہ سمندری طوفان سے قبل جہاز کراچی پہنچنے میں کامیاب ہوگیا۔
ذرائع کے مطابق روسی خام تیل کا جہاز کراچی پورٹ کی آئل پیئر 2 پر تیل کی ترسیل کرے گا ۔
