لاہور( نئی تازہ رپورٹ) سابق وزیراعلیٰ پنجاب اور صدر پی ٹی آئی چوہدری پرویزالٰہی کو پنجاب انسٹیٹیوٹ آف کارڈیالوجی میں چیک اپ کے بعد واپس جیل منتقل کردیا گیا۔
رپورٹس کے مطابق چوہدری پرویزالٰہی کو لاہور کی کیمپ جیل میں اچانک دل میں تکلیف محسوس ہوئی،جس پرانہیں جیل سے پنجاب انسٹیٹیوٹ آف کارڈیالوجی پہنچایا گیا۔
قائم مقام ڈی آئی جی آپریشنزعمران کشور سمیت دیگر افسران اور پولیس کی بھاری نفری ہسپتال میں موجود تھی۔
اطلاع ملنے پرچوہدری پرویزالٰہی کی اہلیہ اور بہن ان سے ملاقات کے لیےہسپتال پہنچ گئیں، تاہم پولیس کی جانب سے انکو پرویزالٰہی سے ملاقات کی اجازت نہیں ملی، سابق وزیراعلیٰ تقریباً ساڑھے تین گھنٹےہسپتال میں موجود رہے، جہاں ان کے طبی ٹیسٹ کئے گئے۔
معلوم ہوا ہے کہ پرویزالہی کے ٹیسٹ نارمل آنے کے بعد انکو دوبارہ سخت سیکیورٹی حصار میں کیمپ جیل منتقل کردیا گیا۔
