ناران ( نئی تازہ رپورٹ) این ایچ اے نے بابو سر ٹاپ کوآٹھ ماہ کے بعد سیاحوں کےلئے کھول دیا ۔
نیشنل ہائی وے اتھارٹی کے مطابق کاغان ہائی وے سے بھاری گلیشیئر اور تودے کاٹ کر سڑک کو ٹریفک کےلئے کھولا گیا ہے، سیاح شاہراہ کاغان پر بابو سر ٹاپ تک کا سفر کرسکتے ہیں۔
این ایچ اے حکام کے مطابق درہ بابوسر پرپڑی برف ہٹادی گئی ہے اور سیاحوں کی رسائی یقینی بنادی گئی ہے ۔
این ایچ اے حکام نے سیاحوں کو مشورہ دیا ہے کہ بابو سر ٹاپ کا سفراحتیاط کے ساتھ اور موسم کے مطابق کریں ۔ بتایا گیا ہے کہ بابو سر ٹاپ کے اوپر اور اردگرد کے پہاڑوں پر اب بھی تقریبا چھ سے سات فٹ برف موجود ہے ، یہ برف پگھلنے میں مزید 2 ماہ لگ سکتے ہیں۔
اطلاعات کے مطابق راستہ کھلنے کے بعد سیاحوں کی بڑی تعداد دیوانہ وار برفیلی راہداریوں سے بابوسر ٹاپ پہنچ چکی ہے۔
عام طور پر برف کی وجہ سے بابوسر کا راستہ اکتوبر سے جون تک بند رہتا ہے اورسطح سمندر سے 13700فٹ بلند یہ مقام سیاحوں کی پہنچ سے دور رہتا ہے۔
