کراچی ( نئی تازہ رپورٹ ) ضمنی بلدیاتی الیکشن میں کراچی کی 11 میں سے 7 یونین کونسلز میں پیپلز پارٹی جیت گئی، جبکہ 4 یوسیز میں جماعت اسلامی کامیاب ہوئی۔اس طرح صوبائی دارالحکومت میں میدان پاکستان پیپلز پارٹی نے مار لیا ۔
کورنگی یوسی 3 کے غیرسرکاری و غیرحتمی نتائج کے مطابق جماعت اسلامی کے چیئرمین کے امیدوار 3412ووٹ لےکر کامیاب ہوئے ۔
ضلع وسطی کی یوسی 6 نارتھ ناظم آباد کے غیرسرکاری غیرحتمی نتائج کے تحت جماعت اسلامی کے فیصل نسیم 2500 ووٹ لیکر چیئرمین منتخب ہوگئے ۔
ضلع کورنگی یوسی 2 کے غیر حتمی و غیر سرکاری نتائج کے مطابق پاکستان پیپلز پارٹی کے چیئرمین کےامیدوار 2682 ووٹ لیکر کامیاب ہوئے ۔
ضلع جنوبی لیاری یوسی 2 کے غیر حتمی و غیر سرکاری نتائج کے تحت پیپلز پارٹی کے امیدوار نے3245 ووٹ لیکر چیئرمین کی نشست جیت لی ۔
ضلع کیماڑی بلدیہ ٹاؤن یوسی 2 کے غیرحتمی و غیر سرکاری نتائج کے مطابق پاکستان پیپلز پارٹی کے چیئرمین کے امیدوار 3009 ووٹ لےکر کامیاب رہے، پاکستان تحریک انصاف 1086 ووٹ لیکر دوسرے نمبر پر رہی۔
ضلع غربی کی یوسی ایک اورنگی ٹاؤن کے غیر حتمی و غیر سرکاری نتائج کے تحت پیپلزپارٹی کا امیدوار 2935 ووٹ لیکر کامیاب ہوا ۔
ضلع غربی کی یوسی 2 اورنگی سے جماعت اسلامی کا چیئرمین 4778 ووٹ لیکر کامیاب رہا۔ پی پی پی امیدوار 3571 ووٹ لے کر دوسرے نمبر رہا۔
ضلع غربی کی یوسی 8 مومن آباد کے غیر حتمی و غیر سرکاری نتائج کے مطابق پیپلز پارٹی کے امیدوار کو 2664 ووٹ کے ساتھ کامیابی ملی ۔
غیر حتمی اور غیر سرکاری نتائج کے مطابق جنرل ممبرز کی بھی 15 میں سے 7 نشستیں پیپلز پارٹی کے امیدوار جیت گئے جماعت اسلامی ( جے آئی ) کو 5 ، پاکستان تحریک انصاف ( پی ٹی آئی ) 2 اور مسلم لیگ ( ن ) کو ایک نشست پر کامیابی ملی۔
سندھ میں ہونے والے بلدیاتی انتخابات میں کراچی کی پارٹی پوزیشن واضح ہوگئی جس کے مطابق پاکستان پیپلز پارٹی یونین کونسلزکی 246 نشستوں میں سے 97 جیت کر پہلے جبکہ جماعت اسلامی کا 86 سیٹوں کے ساتھ دوسرے نمبر پر ہے ،پاکستان تحریک انصاف 42 سیٹیں جیت کر تیسرے نمبر پر رہی۔
جماعت اسلامی کی جانب سے الیکشن نتائج میں تبدیلی کا الزام عائد کیا گیا اور نتائج کے خلاف سینٹرل کیمپ آفس کے باہر احتجاج کیا گیا اور اس موقع پر امیر جماعت اسلامی کراچی حافظ نعیم الرحمان نے کہا کہ پیپلز پارٹی جعل سازی کر کے تاریخ دہرا رہی ہے۔
حافظ نعیم الرحمان کے مطابق پولیس کے ذریعے نتائج کو تبدیل کیا گیا ۔ امیر جماعت اسلامی کراچی کی جانب سے آج دوپہر ایک بجے دوبارہ احتجاج کا اعلان بھی کیا گیا۔
پاکستان پیپلز پارٹی کے رہنما اور صوبائی وزیر سندھ سعید غنی نے کہا کہ پولنگ کے دوران ہی دھاندلی کے الزامات شروع کر دیئے گئے، یہ جہاں جیت جاتے ہیں وہاں سب ٹھیک اور جہاں ہارنے لگتے ہیں وہاں شور مچا دیتے ہیں۔
سعید غنی نے کہا کہ ہم آپ کا مینڈیٹ تسلیم کرتے ہیں، آپ بھی ہمارا مینڈیٹ مان لیں، اگرکہیں بد نظمی ہوئی ہے تو قانون کے مطابق کارروائی ہونی چاہیے۔
