اسلام آباد( نئی تازہ رپورٹ) وزیرخارجہ بلاول بھٹو زرداری نے کہا ہے کہ پاکستان شنگھائی تعاون تنظیم اور اس کی رکنیت کو بہت اہمیت دیتا ہے۔
شنگھائی تعاون تنظیم ( ایس سی او) کے وزرائے خارجہ کے اجلاس میں شرکت کے لیے جمعرات کو بھارت روانگی سے قبل وزیرخارجہ بلاول بھٹو نے ویڈیو پیغام جاری کرتے ہوئے کہا کہ میرا بھارت جانا اس بات کا ثبوت ہے کہ پاکستان ایس سی او اور اس کی رکنیت کو کتنی اہمیت دیتا ہے۔
بلاولل بھٹو زرداری نے کہا کہ وہ ایس سی او اجلاس کے موقع پر رکن ممالک کے وزرائے خارجہ سے ملاقاتوں کا منتظر ہیں۔ ان ملاقاتوں میں باہمی تعلقات ، خطے اور عالمی مسائل زیر گور لائے جائیں گے۔
شنگھائی تعاون تنظیم وزرائے خارجہ کا دو روزہ اجلاس آج جمعرات سے بھارتی شہر گووا میں شروع ہو رہا ہے۔
تنظیم کے رکن ممالک میں چین ،پاکستان، بھارت، روس، قازقستان، کرغیزستان، تاجکستان اور ازبکستان شامل ہیں۔مبصرین بھارت میں ہونے والے اجلاس میں پاکستانی وزیر خارجہ کی شرکت کو اہم قرار دے رہے ہیں۔
