اسلام آباد( نئی تازہ رپورٹ) سپریم جوڈیشل کونسل میں چیف جسٹس عمرعطا بندیال سمیت8 ججز کے خلاف ریفرنس دائر کردیا گیا۔
ریفرنس میاں داؤد ایڈووکیٹ کی طرف سے سپریم کورٹ کے ان آٹھ ججز کے خلاف دائر کیا گیا ہے جنہوں نے سپریم کورٹ پریکٹس اینڈ پروسیجر بل کے خلاف حکم امتناع جاری کیا۔
ایس جے سی میں دائرریفرنس آئین کے آرٹیکل 209 اور ججز کوڈ آف کنڈکٹ کی دفعہ 3 تا 6 اور 9 کی بنیاد پر دائر کیا گیا ہے۔
سپریم جوڈیشل کونسل میں دائر ریفرنس میں کہا گیا ہے کہ پارلیمنٹ کے منظور کردہ بل کو سماعت کے لیے مقرر کر کے اختیارات سے تجاوز کیا گیا اور 8 رکنی غیر آئینی بینچ تشکیل دیا گیا۔
ریفرنس کی نقول سپریم جوڈیشل کونسل کے ارکان کو بھجوا دی گئی ہیں ۔
