راوالپنڈی ( نئی تازہ رپورٹ) چیف آف آرمی اسٹاف جنرل عاصم منیر نے کہا ہے کہ پاک فوج پاکستان کی خودمختاری اور علاقائی سالمیت کے دفاع کے لیے ہر قسم کے خطرات سے نمٹنے کے لیے پرعزم ہے۔
آئی ایس پی آر کے بیان کے مطابق چیف آف آرمی اسٹاف جنرل عاصم منیر نے لائن آف کنٹرول پر پاک فوج کے جوانوں اور افسران سے ملاقات کی۔ ایل او سی پہنچنے پرکورکمانڈر راولپنڈی کور نے آرمی چیف کا استقبال کیا۔
ملاقات کے دوران پاک فوج کے سربراہ نے کہا کہ پاک فوج پاکستان کی خودمختاری اور علاقائی سالمیت کے دفاع کے لیے ہر قسم کے خطرات سے نمٹنے کے لیے پرعزم ہے۔
بیان کے مطابق آرمی چیف عاصم منیر کو ایل او سی کی صورتحال اور آپریشنل تیاریوں کے بارے میں بریفنگ دی گئی۔آرمی چیف نے افسران اور اہلکاروں سے ملاقات کی اور انہیں مقامی آبادی سے ہر ممکن تعاون کرنے، ثابت قدم رہنے اور انتہائی خلوص اور لگن کے ساتھ فرائض کی انجام دہی پر زور دیا۔
جنرل عاصم منیر نے مسلسل چوکس رہنے کے ساتھ ساتھ آپریشنل تیاریوں اور بلند حوصلے کو برقرار رکھنے پر افسروں اور جوانوں کی حوصلہ افزائی کی۔
آرمی چیف نے کہا کہ کشمیریوں کے منصفانہ مقصد کی حمایت کے لیے پرعزم ہیں اور جموں و کشمیر کا اقوام متحدہ کی قراردادوں کے مطابق حل چاہتے ہیں۔
