اسلام آباد ( نئی تازہ رپورٹ) الیکشن کمیشن آف پاکستان نے پنجاب اسمبلی کے انتخابات کے لیے شیڈول جاری کر دیا۔
الیکشن کمیشن کی جانب سے پنجاب اسمبلی کے انتخابات کا شیڈول سپریم کورٹ کے فیصلے کی روشنی میں جاری کیا گیا ہے۔الیکشن کمیشن کے نوٹیفکیشن کے مطابق پنجاب میں الیکشن 14 مئی کو ہوں گے، کاغذات نامزدگی میں اپیلیں دائر کرنے کی آخری تاریخ 10 اپریل ہو گی۔
نوٹیفکیشن میں کہا گیا ہے کہ اپیلیٹ ٹریبونل اپیلوں پر فیصلے 17 اپریل تک کرے گا جبکہ امیدواروں کی نظرثانی شدہ فہرست 18 اپریل کو جاری کی جائے گی۔ شیڈول کے مطابق کاغذات نامزدگی واپس لینےکی آخری تاریخ 19 اپریل ہوگی، امیدواروں کو انتخابی نشانات 20 اپریل کو جاری ہوں گے۔
پنجاب اسمبلی کے انتخابات کے معاملے پر الیکشن کمیشن کو سپریم کورٹ کے تین رکنی بنچ کا فیصلہ موصول ہو نے کے بعد شیدول جاری کیا گیا ہے۔ سپریم کورٹ نے اپنے فیصلے میں شیڈول بھی دیا ہے جسے اب الیکشن کمیشن نے جاری کیا ہے۔
واضح رہے کہ سپریم کورٹ نے پنجاب اسمبلی کے انتخابات 8 اکتوبر تک ملتوی کرنے کا الیکشن کمیشن کا فیصلہ کالعدم قرار دیتے ہوئے پنجاب میں پولنگ 14 مئی کوکرانے کا حکم دیا تھا۔
