کراچی ( نئی تازہ رپورٹ) پولیس نےکراچی میں راشن کی تقسیم کے دوران بھگڈر سے ہونے والی اموات پر مقدمہ درج کرکے فیکٹری مالک کو گرفتار کر لیا ہے۔
گزشتہ روز کراچی نورس چورنگی سائٹ ایریا کی ایک فیکٹری میں راشن اور زکوة کی تقسیم کے دوران بھگدڑ مچنے سے 3 بچوں اور خواتین سمیت 12 افراد جاں بحق ہوگئے تھے۔
رپورٹس کے مطابق فیکٹری مالکان کی جانب سے راشن تقسیم کیا جا رہا تھا، راشن لینے کے لئے خواتین سمیت لوگوں کی بڑی تعداد جمع ہو گئی۔بتایا گیا ہے کہ فیکٹری انتظامیہ پولیس کو اطلاع دیئے بغیر راشن تقسیم کر رہی تھی، تقسیم کے دوران بھگدڑ مچنے سے پانی کا پائپ ٹوٹ گیا اور پورے پلانٹ میں پانی بھر گیا جس کے بعد بھگدڑ مچ گئی۔بعض اطلاعات کے مطابق اس دوران بجلی کے تار گرنے سے کچھ افراد کو کرنٹ بھی لگا۔
پولیس نے واقعہ کا مقدمہ سرکار کی مدعیت میں فیکٹری مالک عبدالخالق سمیت دیگر ملازمین کے خلاف درج کر کے فیکٹری مالک کو حراست میں لے لیا ہے اور اس سے تفتیش شروع کردی گئی ہے۔
پولیس کے مطابق مقدمہ کا اندراج غفلت اور لاپروائی سے اموات کی دفعات کے تحت کیا گیا ہے۔
