اسلام آباد ( نئی تازہ رپورٹ) پاکستان میں امریکی سفیر ڈونلڈ بلوم نے کہا ہے کہ امریکہ پاکستانی مصنوعات کیلئے سب سے بڑی برآمدی منڈی ہے، اب بھی دوطرفہ تجارت بڑھانے کی گنجائش موجود ہے۔
امریکی سفارتخانہ کی جانب سے پاکستان نیشنل کونسل آف دی آرٹس میں 2 روزہ یو ایس پاکستان انوویشن ایکسپو کا انعقاد کیا گیا ہے، نمائش کا مقصد حکومتِ امریکا کی معاونت سے فعال ہونے والے نئے پاکستانی کاروباری سلسلوں (سٹارٹ اپس) کی کامیابیوں کی کہانیوں کو اجاگرکرنا اور ان کیلئے مزید سرمایہ کاری کی حوصلہ افزائی کرنا ہے۔
امریکی سفیر ڈونلڈ بلوم نے تقریب سے افتتاحی خطاب کرت ہوئے کہا کہ جامع اقتصادی ترقی کو فروغ دینا اور امریکہ اور پاکستان کے درمیان تجارت و سرمایہ کاری کو بڑھانا امریکی حکومت کی اولین ترجیحات میں سے ایک ہے۔
ڈونلڈ بلوم نے کہا کہ امریکہ پہلے ہی پاکستانی مصنوعات کیلئے سب سے بڑی برآمدی منڈی ہے جبکہ ہم سال بہ سال پاکستان میں امریکی سرمایہ کاری میں اضافہ دیکھ رہے ہیں لیکن اب بھی دوطرفہ تجارت کو وسعت دینے کی گنجائش موجود ہے۔
امریکی سفیر نے کہا کہ پاکستان بے پناہ صلاحیتوں سے مالامال ملک ہے لیکن کامیابی کی اگلی منزل تک رسائی کیلئے اختراع پسندی اور ٹیکنالوجی کو فروغ دینے کی اشد ضرورت ہے۔
