لاہور( نئی تازہ رپورٹ) پاکستان تحریک انصاف کے چئیرمین عمران خان نے پولیس کی طرف سے ان گرفتاری کی کوشش کو ڈرامہ قرار دیتے ہوئے کہاہے اصل مقصد اغوا کرکے قتل کرنا ہے۔
عمران خان نے ٹوئٹر پر اپنے بیان میں کہا کہ آنسو گیس سے لے کر واٹرکینن کا استعمال کرنے کے بعد اب یہ براہ راست فائرنگ کررہے ہیں۔
چئیرمین پی ٹی آئی عمران خان نے کہا کہ میں نے گزشتہ شام ضمانتی بونڈ پر دستخط کیے تھے لیکن ڈی آئی جی نے اسے وصول کرنے سے انکار کردیا۔ ان کے مذموم مقاصد کے بارے میں کوئی شک اور شبہ نہیں۔
عمران خان نے کہا کہ نیوٹرل ہونے کا دعویٰ کرنیوالے بتائیں کیا یہ آپ کا نیوٹرل ہونا ہے۔ رینجرز براہ راست نہتے مظاہرین اور ملک کی سب سے بڑی اور مقبول پارٹی کے رہنماؤں سے محاذ آرائی کررہی ہے۔
عمران خان نے کہا کہ پی ٹی آئی رہنماؤں کو غیر قانونی وارنٹ بھیجے جارہے ہیں۔ ان کے کیسز پہلے ہی عدالتوں میں ہیں۔ بدمعاشوں کی حکومت انہیں اغوا اورممکنہ طور پر قتل کرنے کی کوشش کررہی ہے۔
چئیرمین پی ٹی آئی چئیرمین نے کہا کہ ہمارے ورکرز اور قیادت گزشتہ روز سے پولیس کی کارروائی کا نشانہ بن رہے ہیں۔ آج صبح ان کے خلاف آنسو گیس، کیمیکل والے پانی کی واٹر کینن ، ربر کی گولیوں اور براہ راست فائرنگ کی جارہی ہے انہوں نے کہا کہ اب رینجرز لوگوں سے براہ راست محاذ آرائی کررہی ہے۔
