لاہور( نئی تازہ رپورٹ) لاہور کی ضلعی انتظامیہ نے پاکستان تحریک انصاف کوآج پیر کو لاہور میں ریلی نکالنے کی مشروط اجازت دے دی۔
ذرائع کے مطابق نگراں وزیراعلیٰ پنجاب سید محسن نقوی کی ہدایت پر ضلعی انتظامیہ نے پی ٹی آئی رہنماؤں سے ملاقات کے دوران ریلی کے پرامن رہنے کی یقین دہانی حاصل کے بعد پی ٹی آئی رہنماؤں کو ریلی کی اجازت دے دی۔
ذرائع کے مطابق ضلعی انتظامیہ نے پی ٹی آئی قیادت پر واضح کیا ہے کہ ریلی میں عدلیہ اور اداروں یا اُن اداروں کی شخصیات کیخلاف تقاریر، نعرے بازی کی اجازت نہیں ہوگی، بصورت دیگر منتظمین کے خلاف کارروائی عمل میں لائی جاسکتی ہے۔
بعد ازاں ڈپٹی کمشنر لاہور رافع حیدر نے اجازت نامے کا نوٹی فکیشن جاری کیا جس کے مطابق پی ٹی آئی سے حلف لینے کے بعد یہ اجازت دی گئی ہے۔ شرائط کے مطابق ریلی میں عدلیہ اور اداروں کی خلاف تقاریر کی اجازت نہیں ہوگی، سیکیورٹی کو بہتر بنانے کےلئے فوکل پرسن اور پی ٹی آئی ذ مہ داران متعلقہ سیکیورٹی اور ضلعی انتظامیہ کیساتھ تعاون کریں گے۔
نوٹیفکیشن کے مطابق ٹریفک میں خلل نہ ڈالنے اور رواں دواں رکھنے کےلئے پی ٹی آئی ذمہ داران ضلعی انتظامیہ اور ٹریفک پولیس کیساتھ مکمل تعاون کریں گے۔
اجازت نامے میں کہا گیا ہے کہ ریلی کی صورت میں پبلک پراپرٹی کو نقصان پہنچنے کی صورت میں پی ٹی آئی کی متعلقہ انتظامیہ زمہ دار ہوگی، ساؤنڈ سسٹم کے استعمال سے متعلق متعلقہ قانون کی پاسداری کی جائے گی۔ پی ٹی آئی رضا کار ضلعی انتظامیہ کے ساتھ مکمل تعاون کریں گے۔ ریلی کے باعث کسی بھی جگہ کارروباری مراکز کو بند کرنے اور نقصان پہنچانے کی اجازت ہر گز نہیں ہوگی۔
اجازت نامے میں کہا گیا ہے کہ ریلی میں کارکن اور دیگر افراد ڈنڈے، یا ایسی کوئی بھی چیز ساتھ نہیں لاسکیں گے۔ ریلی کے دوران کسی کے بھی جذبات احساسات مجروح نہیں کئے جائیں گے۔ ریلی کےلئے استقبالیہ کیمپ نہیں لگائے جائیں گے۔ ریلی روٹ پر کسی بھی طرح وال چاکنگ نہیں ہوگی اور نہ ہی کسی شہری کو زبردستی جلوس میں شامل کیا جائے گا جبکہ ریلی کو شام ساڑھے پانچ بجے ختم کر دیاجائے گا۔
