لاہور ،گلاسگو ( نئی تازہ رپورٹ) سابق گورنر پنجاب چوہدری محمد سرور نے مسلم لیگ ق میں شمولیت اختیار کر لی۔میڈیا رپورٹ کے مطابق چوہدری سرور نے سابق وزیراعظم و مسلم لیگ (ق) کے صدر چوہدری شجاعت حسین سے ملاقات کی۔ملاقات میں سابق گورنر نے مسلم لیگ ق میں شمولیت اختیار کرنے کے فیصلہ سے آگاہ کیا۔ چوہدری سرور اتوار کو آئندہ کےلائحہ عمل کا اعلان کریں گے۔ اس سے قبلسابق گورنر پنجاب کے ترجمان نے بتایا تھا کہ چوہدری سرور ق لیگ میں شمولت کاباضابطہ اعلان اتوار کوکریں گے۔
قبل ازیں سابق گورنر پنجاب چوہدری سرور نے نجی ٹی وی سے گفتگو میں کہا تھا کہ ایک ہفتے کے دورے پر اسکاٹ لینڈ آیا تھا، یہاں بہت سےدوستوں کے ساتھ سیاسی مشاورت بھی کی، لوگوں نے مشورہ دیا کہ ایسی پارٹی میں جاؤں جو مصالحتی کردار ادا کرے۔
چوہدری سرور کا کہنا تھا کہ سیاسی عدم استحکام کو ختم کرنےکیلئے پل کا کردار ادا کرنےکی ضرورت ہے، انہوں نے کہا کہ لندن میں بھی مظاہرے ہوتے ہیں لیکن سڑکیں بند نہیں کی جاتیں، سیاستدان ملک کے وسیع تر مفاد میں سیاسی عدم استحکام کوختم کریں۔ ایک رپورٹ میں دعویٰ کیا گیا ہے کہ چوہدری سرور کو ق لیگ کی صدارت سونپنے کا فیصلہ کیا گیا ہے جبکہ چوہدری شجاعت پارٹی کے سرپرست اعلیٰ ہوں گے، کئی شخصیات کی مسلم لیگ ق میں شمولیت کا امکان ہے۔ چوہدری سرور پی ٹی آئی کے دور میں 5 ستمبر 2018 سے 3 اپریل 2022 تک گورنر پنجاب رہے ہیں۔