کراچی ( نئی تازہ رپورٹ) صوبائی کابینہ نے کچے میں ڈاکوؤں کے خلاف تین صوبوں کی پولیس اور فوج کے آپریشن اوراس کے لئے 2.7ارب روپے کا اسلحہ خریدنے کی منظوری دے دی۔
میدیا رپورٹ کے مطابق سندھ کابینہ کے اجلاس میں سیکریٹری داخلہ اور آئی جی پولیس نے ارکان کو بریفنگ کے دوران بتایا کہ کچے کے علاقے میں پولیس کو ملٹری گریڈ کا اسلحہ درکار ہے۔
اجلاس کو بتایا گیا کہ ملٹری گریڈ کے اسلحہ کی خریداری کی سفارش اپیکس کمیٹی کے 5 جنوری کے اجلاس میں کی گئی تھی، اسلحہ کی خریداری کے لیے دو ارب 70 کروڑ روپے کی ضرورت ہے۔
سندھ کابینہ نے فنڈز منظور کر تے ہوئے اسلحہ خریدنے کی بھی منظوری دے دی۔ کابینہ کی منظوری سے سندھ حکومت اسلحہ کی خریداری کے لیے وزارت داخلہ سے این او سی لے گی۔
سندھ کابینہ نے فیصلہ کیا کہ ڈاکوؤں کے خلاف کچے میں بڑا اور مشترکہ آپریشن ہوگا جس میں سندھ، پنجاب اور بلوچستان کی پولیس کے ساتھ رینجرز اور فوج بھی حصہ لیں گے۔
وزیراعلیٰ سندھ سید مراد علی شاہ نے اجلاس سے خطاب کرتے ہوئے کہا کہ یہ ایک مشترکہ اور پری پلان آپریشن ہوگا، آپریشن آئی جی پولیس اپنی منصوبہ بندی سے شروع کریں گے۔
