اسلام آباد ( نئی تازہ رپورٹ)عدالت نے تحریک انصاف کے چیئرمین عمران خان کے توشہ خانہ فوجداری کیس میں جاری ناقابل ضمانت وارنٹ گرفتاری منسوخ کرنے کی درخواست مسترد کردی ہے۔
چیئرمین پی ٹی آئی عمران خان کے وکلا نے اسلام آباد کی سیشن عدالت سے جاری ناقابل ضمانت وارنٹ گرفتاری کی منسوخی کے لیے عدالت میں درخواست دائر کی تھی۔
تحریک انصاف کے چیئرمین کی جانب سے وارنٹ منسوخ کرنے کی درخواست اسلام آباد کی سیشن کورٹ میں دائر کی گئی تھی۔عدالت کی جانب سے عمران خان کی جانب سے دائر درخواست پر فیصلہ محفوظ کیا گیا تھا جو کچھ دیر بعد سنا یا گیا۔
ایڈیشنل سیشن جج اسلام آباد ظفر اقبال نے چیئرمین تحریک انصاف کے ناقابل ضمانت وارنٹ گرفتاری کو برقرار رکھتے ہوئے درخواست کو خارج کردیا۔ عدالت نے اس کیس میں عمران خان کو کل منگل 7 مارچ کو طلب کر رکھا ہے۔ عمران خان کے وکیل نے کہا ہےکہ وہ عدالت کے فیصلے کو اسلام آباد ہائیکورٹ میں چیلنج کر نے جا رہے ہیں۔
