اسلام آباد ( نئی تازہ رپورٹ) سعودی عرب نے پاکستان میں 10 کروڑ ڈالر کی سرمایہ کاری کا اعلان کیا ہے۔جس کے تحت سعودیہ پاکستان ٹیک ہاؤس اسلام آباد میں قائم کیا جائے گا۔
سعودی شہزادے فہد بن منصور السعود نے سعودیہ پاکستان ٹیک ہاؤس کےاسلام آباد میں قیام کا اعلان کیا ہے۔ٹیک ہاؤس قائم ہونے سے انفارمیشن ٹیکنالوجی کے شعبوں میں قائم کی جانے والی کمپنیوں سے تجارت کو فروغ ملے گا۔ شہزادہ فہد بن منصور السعود السا انٹریکٹو کے شریک بانی بھی ہیں۔
کمپنی 2009ء میں پاکستان کی کاروباری شخصیت سلمان ناصر نے قائم کی تھی، جس کے لاہور کے علاوہ ریاض میں بھی دفاترہیں۔ شہزادہ فہد نے جنوری میں اعلان کیا تھا کہ انکی کمپنی ایک ہزار سے زائد افراد کیلئے روزگار کے مواقع فراہم کرے گی۔اس سلسلے میں 300سے زائد منصوبے ترجیحی بنیادوں پر شروع ہوں گے جن کی مالیت 100 ملین ڈالر ہوگی۔
