اسلام آباد ( نئی تازہ مانیٹرنگ )سابق وفاقی وزیر اور پاکستان تحریک انصاف کے سیکرٹری اطلاعات فواد چودھری کی اپنے بھائی فیصل چودھری ایڈووکیٹ سے فون کال پرمبینہ گفتگو کی آڈیو منظر عام پر آگئی ہے۔
نجی ٹی وی کے مطابق اور سوشل میڈیا پر موجود مبینہ آڈیو لیک میں فواد چودھری کی ان بھائی فیصل چودھری ایڈووکیٹ سے بات چیت ہو رہی ہے جس میں ججز سے متعلق گفتگو کی گئی۔
مبینہ آڈیو میں بظاہر فواد چودھری لگنے والا شخص اپنے بھائی ( فیصل چودھری ) سے کہتے ہیں کہ اچھا ! میں نے کہا کہ ’سی جے‘ (چیف جسٹس) لاہور کہہ رہا ہے کہ میری کوئی جنرل) بات( کرائیں بندیال کے ساتھ۔
انہوں نے اپنے بھائی سے کہا کہ دوسرا اپنا، مظاہر کے ساتھ ڈار صاحب کے ذریعے، ان کو ذرا مل لیں، اُن سے کہیں کہ آپ کے ساتھ پورا ٹرک کھڑا ہے، آپ بتائیں کیا کر نا ہے؟
فواد چودھری نے فیصل چودھری ایڈووکیٹ سے گفتگو کے دوران کہا کہ میری ذاتی تجویز یہ ہے کہ تارڑ پر تین چار جگہ استغاثہ کرائیں اور اس پر 228 لگوا کر اسے سزا دلوائیں تاکہ ان پر پریشر تو آئے۔
جس پر فواد چودھری کے بھائی فیصل چودھری نے کہا کہ میں صبح کرلیتا ہوں، فواد چودھری نے کہا کہ صبح ان سے پوچھ کر مجھے بتانا، جس پر فیصل چودھری نے کہا کہ ٹھیک ہے۔
اس حوالے سے فیصل چودھری ایڈووکیٹ نے صحافیوں کے سوالات کا واضح جواب دینے کی بجائے بات کو ہنس کر ٹال دیا جبکہ فواد چوہدری نے ایسی گفتگو کی تردید کی ہے۔
