اسلام آباد ( نئی تازہ رپورٹ) بینکنگ کورٹ اسلام آباد نے ممنوعہ فنڈنگ کیس میں پاکستان تحریک انصاف کے چیئرمین عمران خان کو 28 فروری کوپیش ہونےکا حکم دے دیا۔ بینکنگ کورٹ اسلام آباد میں عمران خان اور دیگر کے خلاف فارن ایکسچینج ایکٹ کے تحت ممنوعہ فنڈنگ کیس کی سماعت ہوئی۔ اس موقع پرعمران خان کے وکیل نعیم حیدر پنجوتھہ عدالت میں پیش ہوئے، بینکنگ کورٹ کی جج رخشندہ شاہین نے کیس کی سماعت کی۔
وکیل کی طرف سے عدالت کو بتایا گیا کہ اسلام آباد ہائی کورٹ نے آرڈر دیا ہے کہ عمران خان 28 فروری کوبینکنگ کورٹ میں پیش ہوں۔ عمران خان کے وکلا کی جانب سے اسلام آباد ہائی کورٹ کے آڈر کی کاپی جمع کروادی گئی۔بینکینگ کورٹ نے اسلام آباد ہائی کورٹ کے فیصلے کی روشنی میں عمران خان کو 28 فروری کو پیش ہونے کا حکم دے دیا۔عدالت نے بعدازاں کیس کی سماعت 28 فروری تک ملتوی کر دی ۔
یاد رہے کہ 15 فروری کو اسلام آباد ہائی کورٹ نے بینکنگ کورٹ اسلام آباد کو 22فروری تک چیئرمین پاکستان تحریک انصاف عمران خان کی درخواست ضمانت پر فیصلے سے روک دیا تھا۔
