کراچی( نئی تازہ رپورٹ ) اسلام آباد یونائیٹڈ نے کوئٹہ گلیڈی ایٹرز کو 63 رنز کے بڑے مارجن سے شکست دے کر ایک اور کامیابی سمیٹ لی۔نیشنل اسٹیڈیم کراچی میں کھیلے گئے پاکستان سپر لیگ 8 کے 13 ویں میچ میں کوئٹہ گلیڈی ایٹرزکی ٹیم 221 رنز کے بڑے ہدف کے تعاقب میں 157 رنز بنا کر 19.1 اوور میں آؤٹ ہوگئی۔
گلیڈی ایٹرز کی جانب سے محمد حفیظ نے 48 اور کپتان سرفراز احمد 41، افتخار احمد 39 اور ول شمیڈ نے 17 رنز بنا ئے۔اسلام آباد یونائیٹڈ کی جانب سے حسن علی اور فضل حق فاروقی نے تین تین وکٹیں حاصل کیں۔جبکہ کپتان شاداب خان اور ابرار احمد نے دو، دو کھلاڑیوں کو پویلین کی راہ دکھائی۔
اس سے قبل اسلام آباد یونائیٹڈ نے کوئٹہ گلیڈی ایٹرز کے خلاف ٹاس جیت کر پہلے بیٹنگ کا فیصلہ کیا۔ اسلام آباد یونائیٹڈ کی ٹیم اعظم خان کی دھواں دھار بیٹنگ کی مدد سے مقررہ 20 اوورز میں 6 وکٹوں کے نقصان پر 220 رنز کا بڑااسکور کرنے میں کامیاب رہی۔اسلام آباد یونائیٹڈ کی جانب سے وکٹ کیپر بل باز اعظم خان نے 8 چھکوں اور 9 چوکوں کی مدد سے 97 رنز بنائے۔ آصف علی 42، کولن منرو 38 اور کپتان شاداب خان 12 رنز بنا کر آؤٹ ہوئے۔ جبکہ فہیم اشرف 17 رنز کے ساتھ ناٹ آؤٹ رہے۔کوئٹہ گلیڈی ایٹرز کی جانب سے اوڈین اسمتھ نے 41 اور محمد حسنین نے 52 رنز دے کر دو، دو وکٹیں حاصل کیں، ہ نسیم شاہ نے 32 رنز اور ایمل خان نے 55 رنز دے کر 1،1 کھلاڑی کو آئوٹ کیا۔
