کراچی ( نئی تازہ رپورٹ) پاکستانی پاسپورٹ پر ملازمت کے لیے سعودی عرب جانے والے افغان مسافر کوکراچی میں گرفتار کرلیا گیا،
میڈیا رپورٹ کے مطابق ایف آئی اے امیگریشن نے کراچی ائرپورٹ پر کارروائی کرتے ہوئے افغان مسافر کو آف لوڈ کر دیا ۔ محمد شریف نامی افغان مسافر پرواز نمبر PA170 سے پاکستانی پاسپورٹ پر سعودی عرب جا رہا تھا۔
ایف آئی اے امیگریشن ترجمان کے مطابق مسافر کے پاسپورٹ پر سعودی عرب کے لیے ملازمت کا ویزہ لگ چکا تھا جب کہ دوران تفتیش مسافر امیگریشن کے سوالات پر حکام کو مطمئن نہیں کر سکا۔مسافر اپنی جائے پیدائش اور خاندانی افراد کے حوالے سے کوئی جواب نہ دے سکا۔افغان مسافر کے موبائل میں افغانستان کے متعدد فون نمبرز بھی ملے، جب کہ موبائل سےشناختی دستاویزات اور مختلف تصاویر بھی حاصل کرلی گئیں، جو افغانستان کے مختلف علاقوں میں بنائی گئی تھیں۔ ملزم کو ایف آئی اے اینٹی ہیومن ٹریفکنگ سرکل کراچی کے حوالے کر دیا گیا۔جہاں اس سے مزید تفتیش کی جائے گی۔
