راولپنڈی(نئی تازہ رپورٹ) سکیورٹی فورسز نے ملک بھر میں دہشت گردی کے خلاف آپریشنز میں 3 ماہ کے دوران 142 دہشت گرد ہلاک کردیے ۔ ذرائع کے مطابق حالیہ بڑھتی دہشت گردی کے خلاف سکیورٹی فورسز کی جانب سے متعدد آپریشنز کیے جا رہے ہیں۔ اس سلسلے میں گزشتہ 3 ماہ کے دوران دہشت گردوں اور ان کے سہولت کاروں کی گرفتاریاں عمل میں لائی گئی ہیں اورکئی حملے ناکام بنا دیے گئے ہیں۔ ذرائع کے مطابق مجموعی طور پر ملک بھر میں 6921 آپریشنز کئے گئے جن کے دوران 142 دہشت گردوں کو ہلاک اور 1007 کو گرفتار کیا گیا۔
ذرائع کے مطابق سکیورٹی فورسز کی کارروائیوں میں خیبر پختونخوا میں 1960 آپریشنز، 1516 ایریا ڈومینیشن آپریشنز، 301 انٹیلی جنس بیسڈ آپریشنز،143 ایریا سینیٹائزیشن آپریشنز کیے گئے جب کہ 98 دہشت گرد ہلاک اور 540 گرفتار ہوئے۔ اسی طرح بلوچستان میں 3414 آپریشنز،2980 ایریا ڈومینیشن آپریشنز،67 انٹیلی جنس بیسڈ آپریشنز، 367 ایریا سینیٹایزیشن آپریشنز کیے گئے .اور 40 دہشت گردوں کو ہلاک جبکہ 112 کو گرفتار کیا گیا۔
علاوہ ازیں سندھ میں بھی 752ا نٹیلی جنس پر مبنی آپریشنز کیے گئے، جن میں 3د ہشت گردوں کو ہلاک اور 344 کو گرفتار کیا گیا۔صوبہ پنجاب میں 165انٹیلی جنس پر مبنی آپریشنز کیے گئے۔ جن کے دوران ایک دہشت گرد ہلاک ہوا جب کہ11کو گرفتار کیا گیا۔ذرائع کے مطابق ملک بھر میں دہشت گردی کی روک تھام کے لیے سکیورٹی فورسز کے آپریشنز کا سلسلہ جاری ہے۔
