کراچی (نئی تازہ سپورٹس ڈیسک) پاکستان سپر لیگ 8 کے اہم میچ میں اسلام آباد یونائیٹڈ نے کراچی کنگز کو 4 وکٹوں سے شکست دے دی۔ کراچی کنگز کو ہوم گرائونڈ پر مسلسل دوسری شکست کا سامنا کرنا پڑا۔جمعرات کونیشنل اسٹیڈیم کراچی میں کھیلے گئے میچ میں اسلام آبادیونائیٹڈ نے ٹاس جیت کر پہلے فیلڈنگ کا فیصلہ کیا، کراچی کنگز نے پہلے کھیلتے ہوئے مقررہ 20 اوورز میں 7 وکٹوں کے نقصان پر 173 رنز بنائے۔کراچی کنگز کی جانب سے حیدر علی 59 اور شرجیل خان 34 رنز بناکر نمایاں رہے۔ اسلام آباد کے رومان رئیس، محمد وسیم جونیئر اور ٹام کرن نے دو دو وکٹیں حاصل کی۔
اسلام آباد یونائیٹڈ نے 174 رنز کا ہدف 6 وکٹوں کے نقصان پر 19 ویں اوور میں حاصل کر لیا۔اسلام آباد یونائیٹڈ کی جانب سے گولن منرو نے 58 اور اعظم خان نے 44 رنز بنائے۔ ریسی وین ڈر ڈوسین 31 اور فہیم اشرف 12 رنز بناکر آؤٹ ہوئے۔ٹام کرن 10 رنز بنا کر ناٹ آؤٹ پویلین لوٹے۔کراچی کنگز کی جانب سے محمد عامر اور محمد موسی نے 2،2 جبکہ کپتان عماد وسیم نے 1 وکٹ حاصل کی۔ پی ایس ایل میں کراچی کنگز کو مسلسل دوسرے میچ میں شکست کا سامنا کرنا پڑا، پہلے میچ میں اسے پشاور زلمی ہاتھوں شکست ہوئی تھی۔
